ओएलएक्स किंवा तत्सम साइटवर खरेदी करता आहात?

ओएलएक्स किंवा तत्सम साइटवर खरेदी करता आहात?

संतोष तालुक्याच्या गावी राहणारा एक सुशिक्षित शेतकरी तरुण. ऑनलाईन व्यवहारां ची बऱ्यापैकी समज असलेला.

त्याच्या स्मार्टफोन वरील ओएलएक्स अॅपवर एके दिवशी त्याने सेकंडहॅण्ड स्कॉर्पिओ गाडी विक्रीला असल्याची पोस्ट पाहिली. बंगलोरमधील प्रकाश शर्मा नांवाच्या एका सरकारी अधिकाऱ्याला आपली दहा वर्षे जुनी स्कॉर्पिओ एक लाख पाच हजारांत विकायची होती. गाडीचे रजिस्ट्रेशन ठाणे जिल्ह्यातील पालघरचे होते. फोटोंवरून गाडी चांगल्या कंडिशनमध्ये दिसत होती. ऑफर आकर्षक असल्याने संतोषने गाडी खरेदी करण्याचे ठरवले.

फोनवरून त्याने शर्माशी संवाद साधला व व्यवहार नक्की केला. सुरुवातीला एकवीस हजार रुपये घेऊन गाडी जळगावपर्यंत पाठवण्यास शर्मा तयार झाला. उरलेली रक्कम गाडीचा ताबा घेतल्यावर द्यायची असे ठरले. त्याप्रमाणे संतोषने पेटीएमद्वारे शर्माला एकवीस हजार रुपये ट्रान्सफर केले. संतोषच्या व्हॉट्सअॅपवर शर्माने त्याची अॅक्नॉलेजमेंट देखील पाठवली. गाडी जळगाव पर्यंत पोहोचली आहे आणि मुलाच्या वैद्यकीय उपचारांसाठी पैशांची अतोनात गरज आहे असे सांगून शर्माने आणखी बत्तीस हजार रुपये संतोषला पाठवण्यास सांगितले. त्याच्या बोलण्यावर विश्वास ठेवून संतोषने पेटीएमद्वारे पैसे ट्रान्सफर केले.

या घटनेला दीड महिना झाला. पण अजून संतोष गाडी मिळण्याची वाट बघत आहे. संतोषने बऱ्याचदा शर्माला फोन केले पण त्याचे म्हणणे एकच. . . उरलेले सगळे पैसे द्या आणि गाडी घेऊन जा. संतोषने अोएलएक्स हेल्प सेंटरला आणि पोलिसांतही कम्प्लेंट केली आहे. पुरावे म्हणून पेटीएमवरून पैसे ट्रान्स्फर केल्याचे स्क्रीन शॉटस्, शर्माचा फोन नंबर, ओएलएक्स वरील पोस्टचे स्क्रिनशॉटस् सर्व दिले आहेत पण अजूनही काही होऊ शकले नाही. संतोषचे त्रेपन्न हजार रुपये बुडाले, बहुमोल वेळ गेला आणि वरून मनस्ताप देखील झाला.

ओएलएक्स वरील फेक सेलर्स ओळखण्यासाठीच्या काही टीप्स . .
- एखादी वस्तू तिच्या मार्केटमधील किमतीपेक्षा बऱ्याच कमी किंमतीत मिळत असेल तर काहीतरी गडबड आहे असे समजावे आणि त्या वस्तू बाबतचा व्यवहार टाळावा.
- व्यवहार होण्याअगोदर सेलर जास्त किंवा वारंवार पैसे मागत असेल तर असा व्यवहार टाळावा.
- सेलर जर प्रत्यक्ष भेट किंवा ओएलएक्स वरील चॅट टाळून तुमच्याशी फोनवर, व्हॉटस्अॅपवर किंवा इमेलवर बोलणे पसंत करत असेल तर तो फेक असण्याची शक्यता असते. कारण ओएलएक्स वरील चॅट पुरावा म्हणून रेकॉर्ड केला जातो.
- ओएलएक्स किंवा तत्सम साइटवर फेक सेलर्स आणि बायर्सचे रिव्ह्यूज् असतात व्यवहार करण्याअगोदर ते जरूर तपासून घ्यावे.

©कविता दातार